Accueil > Français > E reo tō ’u > ’Ōrero nō ’Ōpunohu : Te fenua ’e te moni (Hiro’a n°143 - Août 2019)

’Ōrero nō ’Ōpunohu : Te fenua ’e te moni (Hiro’a n°143 - Août 2019)


’Āi’a. E mea here roa o Marimari i tō na ’āi’a, mai tō na nā metua Medford rāua Gladys e here i tērā fenua. Ua ani rāua ia ha’a- maita’i-hia te feiā fa’a’apu iho ā nō Papetō’ai i te fa’a. Te fare metua ō Marimari Kellum tei peinihia i ni’a i teie titiro rata hānere farane.

Mānava i te rima turu, i ni’a i te marae Puatea ! Mānava i te mau arata’i, i ni’a i te papa nō Tau- mata-fe’e-fa’atupu-hau !
Mānava e te mau ti’a, i ni’a i te vauvau nō ‘Āmēhiti !
Mānava i te ti’a rautī, i ni’a i te tuaivi nō Tupāuruuru !
Tei ‘ore i ‘āmui mai, terā mai te mou’a nō Tamara-to’ofā e arōha atu nei iā ‘outou !

Te nūna’a tumu nō ‘Aimeho nui
E fāri’i nei iā mātou i ni’a i te tino repo ō tō ‘outou mētua vāhine1
‘Outou, e tō te fenua mā’ohi e rātere nei i ni’a iā ‘Aimeho nui
Tātou e hātua tini nei iā ‘oe, e ‘Ōpūnohu Tōmitehia ‘e te ‘āti tūpuna here
Patuhia i ni’a i te paepae ō te atua ō te hau Māevā ! Māevā !
Hāere mai ! Hāere mai !
Mānava ! Mānava !

‘O vai ‘oe ?
‘Ōpūnohu, e repo ‘āi‘a ‘oe
Tei ha’aputu i te mau rā’au huru rau e maita’i ai te fēti’i tamari’i
‘Ōpūnohu, e fenua ‘ere’ere ‘oe
Tei ‘ī i te marae : Ti’iroa, Māhine...
Tei ‘ī i te nūna’a here fenua i mūta’a iho ra ‘Ōpūnohu, ‘ua vai noa te mau ‘ōfa’i-tere2
‘Ua taha noa ‘o Tahu-mate3, ‘ōfa’i ma’o4
‘Ua tahe te pape mato ō te pīha’a, mai roto mai iā Tautua-pae
Tī-’ura, Mou’a-roa, Mou’a-pū, Rōtui, Tohi’e’a5... Te vai ti’a noa ra te papara’a tūpuna ō te nūna’a tumu nō Mo’orea

E te metua vahine ē
Erā ‘ē na te tau, i fēruri ai, i hōro’a ai, i mātutu ai I fa’a’ohipa ai tō tūpuna i tō na pa’ari
Tō na ‘ite i te reo, pūrara mata’eina’a atu ai Mou’a-pū
E mou’a tō ni’a, Te-iriiri-ta’ata-’uru-pē Papa-i-te-anatua, te tahua i raro
Vaipao te ‘ōtue i tai
Erā ‘ē na te tau, i pau ai te fenua i te ta’ata ‘ē’ē
I vai noa na ‘o ‘Ōpūnohu i roto i te māna’ona’ora’a ō te tau
‘Ahiri pa’i ē... ‘ahiri...

Iā ‘u i tūfenefene i te muriāvai nō Vaiaha i Hiti’a’ā-ō-te-rā
Nānā noa atu ai tō ‘u mata i tua
Vai ti’a noa ‘o ‘Ōpūnohu
Fāriu i ‘Aimeho, hipa i Hūāhine
E neva atu ra i Tetūfera, moti ai i Teviriviritera’i Nā ‘ō atu ra te māna›o ē : ‘Ōpūnohu, Mataiva, Makatea, Takaroa, Tūpai.

Te u’i nō teie mahana, te u’i nō anānahi
Tō ‘oe mētua vāhine, e faufa’a ai te rama tā ‘oe e mau nei
Tō ‘oe mētua vāhine, e nīnamu ai te ‘autī pūfenua i tanuhia i teie mahana
Nā te māpē ‘ati nō Hiti’a’ā-ō-te-rā mai, nā te ohi ‘uru, nā te ‘ōfa›i-marae ‘Apuitera’i
E fa’a’ite mai i te faufa’a ō te huero i ueuehia ‘e tātou
Tātou tei tā’atihia i ni’a i te tahua nō ‘Ōpūnohu ‘A patu... ‘a rohi... ‘a heru... ‘a here i tō ‘āi’a
I tūtu’uhia mai ‘e te hui tūpuna !
‘Ia toahia ‘oe, e Pāruru iā Mo’orea
‘Ia roa’ahia tō ‘oe puo, e Pāruru iā Mo’orea

‘Eiaha ‘oe ‘ia topa i roto i te herepata ō te ‘ohipa ho’ora’a ‘āi’a
‘Eiaha ‘oe ‘ia hahi noa i te pīna’ina’i ō te ta’i moni ‘Eiaha ‘oe ‘ia ‘ume-noa-hia ‘e te peu tāho’o

Tei te ‘ōri’ō mata te nehenehe ō te u’i ‘āpī nō anānahi
Tei te pū tari’a te mihi ō te nūna’a tumu ō te fenua mā’ohi
Tei tō vaha te marū ō te parau ti’a ‘e te parau mā ‘A tāpe’a i tō fenua ‘ere’ere, ‘a tāpe’a i tō mētua vāhine !
Te vai nei te tau tātou e fārērei fa’ahou ai...
(Mo’orea i te 20 nō ‘eperera 1991, Gaby Teti’arahi)

1 La terre, mère nourricière, la nature
2 « Pierres qui marchent/avancent »
3 Ancien nom de la rivière du fond de la baie de ‘Ōpūnohu
4 Pâté de corail au fond de la passe Tā’āreu (cf. mythe de la tentative d’enlèvement de Rōtui)
5 Noms des montagnes du cratère.

Ce ‘ōrero a été confié à Natea Montillier, linguiste au sein de la direction de la Culture et du Patrimoine, par Marimari Kellum- Ottino disparue en juin dernier. Un hommage lui est rendu page 26.

- ’Ōrero nō ’Ōpunohu : Te venus ’e te moni (Hiro’a n°143 - Août 2019) (à télécharger)